زینہ ملا نہ یار کے بام وصال کا

زینہ ملا نہ یار کے بام وصال کا

بیٹھا ہے تھک کے عرش پہ طائر خیال کا

یوں حفظ رتبہ کرتے ہیں اہل کمال کا

ناخن نہ آسماں نے کیا کم ہلال کا

پہنچے ہمارے لعل کو ہر چند نرخ میں

مشک تتار خون ہے ناف غزال کا

صبح شب فراق کی امید کیا کروں

دورا ہے نا تمام ابھی ماہ و سال کا

پنہاں نظر سے ہونے لگا آفتاب عمر

اللہ رے عروج ہمارے زوال کا

رسوا کرے گی خلق میں حاجت فقیر کو

درہم سفید داغ ہے دست سوال کا

چاہا نہ جبکہ دیں دہن یار کا ثبوت

شیشہ گرا ہے سنگ پہ فرض محال کا

کشتی لگائے کیوں سر ساحل کھڑی ہے موج

کیا انتظار ہے کسی آشفتہ حال کا

کیونکر عزیز آئنۂ دل نہ ہو مجھے

صورت بنا ہے یار کے حسن و جمال کا

بے برگ نخل خشک کی صورت جہاں میں ہوں

کاملؔ ثمر یہ مجھ کو ملا ہے کمال کا