zina mila na yar ke baam-e-visal ka

ziina milā na yaar ke bām-e-visāl kā

baiThā hai thak ke 'arsh pe taa.ir ḳhayāl kā

yuuñ hifz rutba karte haiñ ahl-e-kamāl kā

nāḳhun na āsmāñ ne kiyā kam hilāl kā

pahuñche hamāre laa'l ko har chand narḳh meñ

mushk-e-tatār ḳhuun hai nāf-e-ġhazāl kā

sub.h-e-shab-e-firāq kī ummīd kyā karūñ

daurā hai nā-tamām abhī māh-o-sāl kā

pinhāñ nazar se hone lagā āftāb-e-‘umr

allāh re 'urūj hamāre zavāl kā

rusvā karegī ḳhalq meñ hājat faqīr ko

dirham safed daaġh hai dast-e-savāl kā

chāhā na jabki deñ dahan-e-yār kā subūt

shīsha girā hai sang pe farz-e-muhāl kā

kashtī lagā.e kyuuñ sar-e-sāhil khaḌī hai mauj

kyā intizār hai kisī āshufta-hāl kā

kyūñkar 'azīz ā.ina-e-dil na ho mujhe

sūrat banā hai yaar ke husn-o-jamāl kā

be-barg naḳhl-e-ḳhushk kī sūrat jahāñ meñ huuñ

'kāmil' samar ye mujh ko milā hai kamāl kā

zina mila na yar ke baam-e-visal ka

baiTha hai thak ke 'arsh pe tair KHayal ka

yun hifz rutba karte hain ahl-e-kamal ka

naKHun na aasman ne kiya kam hilal ka

pahunche hamare la'l ko har chand narKH mein

mushk-e-tatar KHun hai naf-e-ghazal ka

subh-e-shab-e-firaq ki ummid kya karun

daura hai na-tamam abhi mah-o-sal ka

pinhan nazar se hone laga aaftab-e-‘umr

allah re 'uruj hamare zawal ka

ruswa karegi KHalq mein hajat faqir ko

dirham safed dagh hai dast-e-sawal ka

chaha na jabki den dahan-e-yar ka subut

shisha gira hai sang pe farz-e-muhaal ka

kashti lagae kyun sar-e-sahil khaDi hai mauj

kya intizar hai kisi aashufta-haal ka

kyunkar 'aziz aaina-e-dil na ho mujhe

surat bana hai yar ke husn-o-jamal ka

be-barg naKHl-e-KHushk ki surat jahan mein hun

'kaamil' samar ye mujh ko mila hai kamal ka