غم ہجراں تو کٹا شوخ نگار آ تو گئی

غم ہجراں تو کٹا شوخ نگار آ تو گئی

خلوت عشق میں جلووں کی بہار آ تو گئی

لمس گل باعث تاراجیٔ الفت ہوتا

بوئے گل دوش بہاراں پہ سوار آ تو گئی

شعلۂ رخ نہ سہی شعلۂ حرماں ہی سہی

رات پھر آتش فرقت بہ کنار آ تو گئی

اب جو ہمت ہو تو زلفوں کی بلائیں لے لو

کس نئی سوچ میں ہو جان قرار آ تو گئی

آبلہ پائی تھی آسائش منزل کی دلیل

دشت کی رات کٹی صبح دیار آ تو گئی

اور کس شے کی محبت سے طلب رکھتے ہو

تا بہ دل گرمیٔ رخسارۂ یار آ تو گئی

اب نہیں بیٹھ کے تا حشر سلگنا ہوگا

عشق کی منزل بے راہ گزار آ تو گئی

اب کسی دشت میں کیا ڈھونڈھنے جاؤ گے ظہیرؔ

شیشۂ دل میں نظر صورت یار آ تو گئی