gham-e-hijran to kaTa shoKH nigar aa to gai

ġham-e-hijrāñ to kaTā shoḳh nigār aa to ga.ī

ḳhalvat-e-'ishq meñ jalvoñ kī bahār aa to ga.ī

lams-e-gul bā'is-e-tārājī-e-ulfat hotā

bū-e-gul dosh-e-bahārāñ pe savār aa to ga.ī

sho'la-e-ruḳh na sahī sho'la-e-hirmāñ hī sahī

raat phir ātish-e-furqat ba-kanār aa to ga.ī

ab jo himmat ho to zulfoñ kī balā.eñ le lo

kis na.ī soch meñ ho jān-e-qarār aa to ga.ī

ābla-pā.ī thī āsā.ish-e-manzil kī dalīl

dasht kī raat kaTī sub.h-e-dayār aa to ga.ī

aur kis shai kī mohabbat se talab rakhte ho

tā-ba-dil garmī-e-ruḳhsāra-e-yār aa to ga.ī

ab nahīñ baiTh ke tā-hashr sulagnā hogā

'ishq kī manzil-e-be-rāh-guzār aa to ga.ī

ab kisī dasht meñ kyā DhūñDhne jāoge 'zahīr'

shīsha-e-dil meñ nazar sūrat-e-yār aa to ga.ī

gham-e-hijran to kaTa shoKH nigar aa to gai

KHalwat-e-'ishq mein jalwon ki bahaar aa to gai

lams-e-gul ba'is-e-taraji-e-ulfat hota

bu-e-gul dosh-e-bahaaran pe sawar aa to gai

sho'la-e-ruKH na sahi sho'la-e-hirman hi sahi

raat phir aatish-e-furqat ba-kanar aa to gai

ab jo himmat ho to zulfon ki balaen le lo

kis nai soch mein ho jaan-e-qarar aa to gai

aabla-pai thi aasaish-e-manzil ki dalil

dasht ki raat kaTi subh-e-dayar aa to gai

aur kis shai ki mohabbat se talab rakhte ho

ta-ba-dil garmi-e-ruKHsara-e-yar aa to gai

ab nahin baiTh ke ta-hashr sulagna hoga

'ishq ki manzil-e-be-rah-guzar aa to gai

ab kisi dasht mein kya DhunDhne jaoge 'zahir'

shisha-e-dil mein nazar surat-e-yar aa to gai