میں وہ ہوں میں نے تمہارے پاؤں پر سر رکھ دیا

میں وہ ہوں میں نے تمہارے پاؤں پر سر رکھ دیا

تم وہ ہو پھر بھی گلے پر میرے خنجر رکھ دیا

یہ ستم تھے میری قسمت میں تو قسام ازل

کیوں نہ اس دل کی جگہ پہلو میں پتھر رکھ دیا

کہہ رہے ہیں مجھ سے وہ دیکھی تمہاری منصفی

دل تو زلفوں کو دیا الزام مجھ پر رکھ دیا

مجھ سے کہتے ہیں قسم تو خیر کھا لیتے مگر

ہاتھ تم نے کیا سمجھ کر میرے سر پر رکھ دیا

اب وہ گھر لے جائیں اس کو یا سر محفل پئیں

شیخ جی کے نام کا ساغر تو بھر کر رکھ دیا

میری تربت پر انہیں پھر کون لائے گا قمرؔ

قبر بلبل پر کسی نے کب گل تر رکھ دیا