دیار عشق ہر ہر گام کتنا عیش دشمن ہے

دیار عشق ہر ہر گام کتنا عیش دشمن ہے

کہ اس کے ذرے ذرے میں سمویا کربلا پن ہے

یہ مانا جلوہ زار زندگی وادیٔ ایمن ہے

بہ ایں انداز بھی وہ روئے زیبا زیب چلمن ہے

اگر ہے باغباں برہم تو باہم برق دشمن ہے

وبال جان بلبل کو گلستاں میں نشیمن ہے

سواد شام کو نام و نمود صبح دیتے ہیں

بہار نو دمیدہ بھی فریب اہل گلشن ہے

تری پیمائی دشت و جبل کو کیا ہوا آخر

کہ اے شہباز تجھ کو آج کل فکر نشیمن ہے

فریبی رنگتوں سے پاک جس کے لالہ و گل ہوں

زمیں پر غیرت فردوس ہے ایسا جو گلشن ہے

جمالؔ انساں تلون طبع کا عالم نہ کچھ پوچھو

بنے تو قوم بن جائے بگڑ جائے تو آہن ہے