dayar-e-ishq har har gam kitna aish-dushman hai

dayār-e-'ishq har har gaam kitnā 'aish-dushman hai

ki is ke zarre zarre meñ samoyā karbalā-pan hai

ye maanā jalva-zār-e-zindagī vādī-e-aiman hai

ba-īñ-andāz bhī vo rū-e-zebā zeb-e-chilman hai

agar hai bāġhbāñ barham to bāham barq dushman hai

vabāl-e-jān bulbul ko gulistāñ meñ nasheman hai

savād-e-shām ko nām-o-numūd-e-sub.h dete haiñ

bahār-e-nau-damīda bhī fareb-e-ahl-e-gulshan hai

tirī paimā.ī-e-dasht-o-jabal ko kyā huā āḳhir

ki ai shahbāz tujh ko aaj kal fikr-e-nasheman hai

farebī rangatoñ se paak jis ke lāla-o-gul hoñ

zamīñ par ġhairat-e-firdaus hai aisā jo gulshan hai

'jamāl' insāñ talavvun-tab’ kā 'ālam na kuchh pūchho

bane to qaum ban jaa.e bigaḌ jaa.e to aahan hai

dayar-e-'ishq har har gam kitna 'aish-dushman hai

ki is ke zarre zarre mein samoya karbala-pan hai

ye mana jalwa-zar-e-zindagi wadi-e-aiman hai

ba-in-andaz bhi wo ru-e-zeba zeb-e-chilman hai

agar hai baghban barham to baham barq dushman hai

wabaal-e-jaan bulbul ko gulistan mein nasheman hai

sawad-e-sham ko nam-o-numud-e-subh dete hain

bahaar-e-nau-damida bhi fareb-e-ahl-e-gulshan hai

teri paimai-e-dasht-o-jabal ko kya hua aaKHir

ki ai shahbaz tujh ko aaj kal fikr-e-nasheman hai

farebi rangaton se pak jis ke lala-o-gul hon

zamin par ghairat-e-firdaus hai aisa jo gulshan hai

'jamal' insan talawwun-tab’ ka 'alam na kuchh puchho

bane to qaum ban jae bigaD jae to aahan hai