رفتہ رفتہ میری آہوں میں اثر آ ہی گیا

رفتہ رفتہ میری آہوں میں اثر آ ہی گیا

آتے آتے وہ ستم گر راہ پر آ ہی گیا

یہ تو سچ ہے وصل کا دن میری قسمت میں کہاں

فرض کر لو بھولے دھوکے سے اگر آ ہی گیا

کچھ نہ کچھ آخر کیا ہے میرے نالوں نے اثر

لے کے خنجر ہاتھ میں وہ فتنہ گر آ ہی گیا

دیکھ کر مجھ کو وہ کہتے ہیں خدا اس سے بچائے

بزم دشمن میں بھی یہ شوریدہ سر آ ہی گیا

اس کو ایسی ہی پڑی ہے نامہ بر ہاں کیوں نہیں

کہہ دیا تجھ سے تو وہ اب میرے گھر آ ہی گیا

مجھ کو روتے دیکھ کر وہ آج خود بھی رو دیئے

رحم آخر ان کو میرے حال پر آ ہی گیا

تیری خواہش سے نہ ہوگا میری قسمت سے سہی

ظلم کرنا تجھ کو اے بیداد گر آ ہی گیا

خیر وہ دشمن نہ ہوں نفرت تو کرنے ہی لگے

کچھ نہ کچھ دشمن کی صحبت کا اثر آ ہی گیا

اب اجل پھرنے لگی میری نگاہوں میں قمرؔ

عشق کا انجام آخر کو نظر آ ہی گیا