rafta rafta meri aahon mein asar aa hi gaya

rafta rafta merī aahoñ meñ asar aa hī gayā

aate aate vo sitam-gar raah par aa hī gayā

ye to sach hai vasl kā din merī qismat meñ kahāñ

farz kar lo bhūle dhoke se agar aa hī gayā

kuchh na kuchh āḳhir kiyā hai mere nāloñ ne asar

le ke ḳhanjar haath meñ vo fitna-gar aa hī gayā

dekh kar mujh ko vo kahte haiñ ḳhudā is se bachā.e

bazm-e-dushman meñ bhī ye shorīda-sar aa hī gayā

us ko aisī hī paḌī hai nāma-bar haañ kyoñ nahīñ

keh diyā tujh se to vo ab mere ghar aa hī gayā

mujh ko rote dekh kar vo aaj ḳhud bhī ro diye

rahm āḳhir un ko mere haal par aa hī gayā

terī ḳhvāhish se na hogā merī qismat se sahī

zulm karnā tujh ko ai bedād-gar aa hī gayā

ḳhair vo dushman na hoñ nafrat to karne hī lage

kuchh na kuchh dushman kī sohbat kā asar aa hī gayā

ab ajal phirne lagī merī nigāhoñ meñ 'qamar'

'ishq kā anjām āḳhir ko nazar aa hī gayā

rafta rafta meri aahon mein asar aa hi gaya

aate aate wo sitam-gar rah par aa hi gaya

ye to sach hai wasl ka din meri qismat mein kahan

farz kar lo bhule dhoke se agar aa hi gaya

kuchh na kuchh aaKHir kiya hai mere nalon ne asar

le ke KHanjar hath mein wo fitna-gar aa hi gaya

dekh kar mujh ko wo kahte hain KHuda is se bachae

bazm-e-dushman mein bhi ye shorida-sar aa hi gaya

us ko aisi hi paDi hai nama-bar han kyon nahin

keh diya tujh se to wo ab mere ghar aa hi gaya

mujh ko rote dekh kar wo aaj KHud bhi ro diye

rahm aaKHir un ko mere haal par aa hi gaya

teri KHwahish se na hoga meri qismat se sahi

zulm karna tujh ko ai bedad-gar aa hi gaya

KHair wo dushman na hon nafrat to karne hi lage

kuchh na kuchh dushman ki sohbat ka asar aa hi gaya

ab ajal phirne lagi meri nigahon mein 'qamar'

'ishq ka anjam aaKHir ko nazar aa hi gaya