Sher on Virani

dil par dastak dene kaun aa niklā hai

kis kī aahaT suntā huuñ vīrāne meñ

dil par dastak dene kaun aa nikla hai

kis ki aahaT sunta hun virane mein

maiñ vo bastī huuñ ki yād-e-raftagāñ ke bhes meñ

dekhne aatī hai ab merī hī vīrānī mujhe

main wo basti hun ki yaad-e-raftagan ke bhes mein

dekhne aati hai ab meri hi virani mujhe

koī vīrānī sī vīrānī hai

dasht ko dekh ke ghar yaad aayā

koi virani si virani hai

dasht ko dekh ke ghar yaad aaya

andar se maiñ TūTā-phūTā ek khañDar vīrāna thā

zāhir jo ta.amīr na hotī to maiñ yaaro kyā kartā

andar se main TuTa-phuTa ek khanDar virana tha

zahir jo tamir na hoti to main yaro kya karta

na ham vahshat meñ apne ghar se nikle

na sahrā apnī vīrānī se niklā

na hum wahshat mein apne ghar se nikle

na sahra apni virani se nikla

bastī bastī parbat parbat vahshat kī hai dhuup 'ziyā'

chāroñ jānib vīrānī hai dil kā ik vīrāna kyā

basti basti parbat parbat wahshat ki hai dhup 'ziya'

chaaron jaanib virani hai dil ka ek virana kya

ham se kahte haiñ chaman vaale ġharībān-e-chaman

tum koī achchhā sā rakh lo apne vīrāne kā naam

hum se kahte hain chaman wale ghariban-e-chaman

tum koi achchha sa rakh lo apne virane ka nam

farq nahīñ paḌtā ham dīvānoñ ke ghar meñ hone se

vīrānī umDī paḌtī hai ghar ke kone kone se

farq nahin paDta hum diwanon ke ghar mein hone se

virani umDi paDti hai ghar ke kone kone se

ghar meñ thā kyā ki tirā ġham use ġhārat kartā

vo jo rakhte the ham ik hasrat-e-tāmīr so hai

ghar mein tha kya ki tera gham use ghaarat karta

wo jo rakhte the hum ek hasrat-e-tamir so hai

ḳhatm hone ko haiñ ashkoñ ke zaḳhīre bhī 'jamāl'

ro.e kab tak koī is shahr kī vīrānī par

KHatm hone ko hain ashkon ke zaKHire bhi 'jamal'

roe kab tak koi is shahr ki virani par

merī barbādī meñ hissa hai apnoñ kā

mumkin hai ye baat ġhalat ho par lagtā hai

meri barbaadi mein hissa hai apnon ka

mumkin hai ye baat ghalat ho par lagta hai

banā rakkhī haiñ dīvāroñ pe tasvīreñ parindoñ kī

vagarna ham to apne ghar kī vīrānī se mar jaa.eñ

bana rakkhi hain diwaron pe taswiren parindon ki

wagarna hum to apne ghar ki virani se mar jaen

do jīvan tārāj hue tab puurī huī baat

kaisā phuul khilā hai aur kaisī vīrānī meñ

do jiwan taraj hue tab puri hui baat

kaisa phul khila hai aur kaisi virani mein

ab jis taraf se chāhe guzar jaa.e kārvāñ

vīrāniyāñ to sab mire dil meñ utar ga.iiñ

ab jis taraf se chahe guzar jae karwan

viraniyan to sab mere dil mein utar gain

vo kaam rah ke karnā paḌā shahr meñ hameñ

majnūñ ko jis ke vāste vīrāna chāhiye

wo kaam rah ke karna paDa shahr mein hamein

majnun ko jis ke waste virana chahiye

duur tak dil meñ dikhā.ī nahīñ detā koī

aise vīrāne meñ ab kis ko sadā dī jaa.e

dur tak dil mein dikhai nahin deta koi

aise virane mein ab kis ko sada di jae

itnī saarī yādoñ ke hote bhī jab dil meñ

vīrānī hotī hai to hairānī hotī hai

itni sari yaadon ke hote bhi jab dil mein

virani hoti hai to hairani hoti hai

kis ne ābād kiyā hai mirī vīrānī ko

ishq ne? ishq to bīmār paḌā hai mujh meñ

kis ne aabaad kiya hai meri virani ko

ishq ne? ishq to bimar paDa hai mujh mein

tanhā.ī kī dulhan apnī maañg sajā.e baiThī hai

vīrānī ābād huī hai ujḌe hue daraḳhtoñ meñ

tanhai ki dulhan apni mang sajae baiThi hai

virani aabaad hui hai ujDe hue daraKHton mein

bastiyāñ kuchh huiiñ vīrān to mātam kaisā

kuchh ḳharābe bhī to ābād huā karte haiñ

bastiyan kuchh huin viran to matam kaisa

kuchh KHarabe bhi to aabaad hua karte hain

sahrā ko bahut naaz hai vīrānī pe apnī

vāqif nahīñ shāyad mire ujḌe hue ghar se

sahra ko bahut naz hai virani pe apni

waqif nahin shayad mere ujDe hue ghar se

dil kī vīrānī kā kyā mazkūr hai

ye nagar sau martaba luuTā gayā

dil ki virani ka kya mazkur hai

ye nagar sau martaba luTa gaya

tumhāre rañg phīke paḌ ga.e naañ

mirī āñkhoñ kī vīrānī ke aage

tumhaare rang phike paD gae nan

meri aankhon ki virani ke aage