عبادت پر اشعار

عیادت ہوتی جاتی ہے عبادت ہوتی جاتی ہے

مرے مرنے کی دیکھو سب کو عادت ہوتی جاتی ہے

میں سر بہ سجدہ سکوں میں نہیں سفر میں ہوں

جبیں پہ داغ نہیں آبلہ بنا ہوا ہے

یہ بھوگ بھی ایک تپسیا ہے تم تیاگ کے مارے کیا جانو

اپمان رچیتا کا ہوگا رچنا کو اگر ٹھکراؤ گے

سنا اقبال عصیاں خلوتوں میں وجہ بخشش ہے

کلیساؤں میں یہ طرز عبادت عام ہے ساقی

تھے میری راہ میں لاکھوں بتان نخوت و ناز

کہیں بھی سر نہ جھکا تیرے نقش پا کے سوا

عبادتوں کے معاوضے میں ملے گی جو عابدوں کو جنت

تم اس کا نقشہ کچھ ایسا کھینچو کہ دل پھسل جائے آدمی کا

اب تو ہی میری خالی ہتھیلی کی لاج رکھ

مجھ سے تو کوئی فرق عبادت میں رہ گیا

نماز کیا لغزش قدم بھی ہے مستجاب اس کی بارگہہ میں

اگر میسر حضور‌ دل ہو گناہ بھی بے وضو نہ کرنا

ستارے توڑ لیے ہم نے زہد‌ و تقویٰ کے

مگر جو حق عبادت تھا وہ ادا نہ ہوا