ابھی سے وہ دامن چھڑانے لگے ہو

جو اب تک مرے ہاتھ آیا نہیں ہے

جس درجہ نیک ہونے کی ملتی رہی ہے داد

اس درجہ نیک بننے کا ارماں کبھی نہ تھا

آئے تو دل تھا باغ باغ اور گئے تو داغ داغ

کتنی خوشی وہ لائے تھے کتنا ملال دے گئے

اور ہی وہ لوگ ہیں جن کو ہے یزداں کی تلاش

مجھ کو انسانوں کی دنیا میں ہے انساں کی تلاش

جو لوگ موت کو ظالم قرار دیتے ہیں

خدا ملائے انہیں زندگی کے ماروں سے

کسی کی مہربانی سے محبت مطمئن کیا ہو

محبت تو محبت سے بھی آسودہ نہیں ہوتی

رات سے شکایت کیا بس تمہیں سے کہنا ہے

تم ذرا ٹھہر جاؤ رات کب ٹھہرتی ہے

ہم سے شکایتیں بجا ہم کو بھی ہے مگر گلہ

پہلے سے ہم نہیں اگر پہلے سے آپ بھی نہیں