maiñ to ġhazal sunā ke akelā khaḌā rahā

sab apne apne chāhne vāloñ meñ kho ga.e

main to ghazal suna ke akela khaDa raha

sab apne apne chahne walon mein kho gae

aa.ina ye to batātā hai ki maiñ kyā huuñ magar

aa.ina is pe hai ḳhāmosh ki kyā hai mujh meñ

aaina ye to batata hai ki main kya hun magar

aaina is pe hai KHamosh ki kya hai mujh mein

yahī milne kā samay bhī hai bichhaḌne kā bhī

mujh ko lagtā hai bahut apne se Dar shaam ke baad

yahi milne ka samay bhi hai bichhaDne ka bhi

mujh ko lagta hai bahut apne se Dar sham ke baad

zindagī se baḌī sazā hī nahīñ

aur kyā jurm hai patā hī nahīñ

zindagi se baDi saza hi nahin

aur kya jurm hai pata hi nahin

kaisī ajiib shart hai dīdār ke liye

āñkheñ jo band hoñ to vo jalva dikhā.ī de

kaisi ajib shart hai didar ke liye

aankhen jo band hon to wo jalwa dikhai de

chāhe sone ke frame meñ jaḌ do

aa.ina jhuuT boltā hī nahīñ

chahe sone ke frame mein jaD do

aaina jhuT bolta hi nahin

itne hissoñ meñ baT gayā huuñ maiñ

mere hisse meñ kuchh bachā hī nahīñ

itne hisson mein baT gaya hun main

mere hisse mein kuchh bacha hi nahin

maiñ jis ke haath meñ ik phuul de ke aayā thā

usī ke haath kā patthar mirī talāsh meñ hai

main jis ke hath mein ek phul de ke aaya tha

usi ke hath ka patthar meri talash mein hai

sach ghaTe yā baḌhe to sach na rahe

jhuuT kī koī intihā hī nahīñ

sach ghaTe ya baDhe to sach na rahe

jhuT ki koi intiha hi nahin

miTe ye shub.h to a dost tujh se baat kareñ

hamārī pahlī mulāqāt āḳhirī to nahīñ

miTe ye shubh to a dost tujh se baat karen

hamari pahli mulaqat aaKHiri to nahin

havas ne toḌ dī barsoñ kī sādhnā merī

gunāh kyā hai ye jaanā magar gunāh ke ba.ad

hawas ne toD di barson ki sadhna meri

gunah kya hai ye jaana magar gunah ke baad

tishnagī ke bhī maqāmāt haiñ kyā kyā yaanī

kabhī dariyā nahīñ kaafī kabhī qatra hai bahut

tishnagi ke bhi maqamat hain kya kya yani

kabhi dariya nahin kafi kabhi qatra hai bahut

kyuuñ ā.īna kaheñ use patthar na kyuuñ kaheñ

jis ā.īne meñ aks na us kā dikhā.ī de

kyun aaina kahen use patthar na kyun kahen

jis aaine mein aks na us ka dikhai de

jitne mausam haiñ sabhī jaise kahīñ mil jaa.eñ

in dinoñ kaise batā.ūñ jo fazā hai mujh meñ

jitne mausam hain sabhi jaise kahin mil jaen

in dinon kaise bataun jo faza hai mujh mein

aa.ina ye to batātā hai maiñ kyā huuñ lekin

aa.ina is pe hai ḳhāmosh ki kyā hai mujh meñ

aaina ye to batata hai main kya hun lekin

aaina is pe hai KHamosh ki kya hai mujh mein

ik taraf qānūn hai aur ik taraf insān hai

ḳhatm hotā hī nahīñ jurm-o-sazā kā silsila

ek taraf qanun hai aur ek taraf insan hai

KHatm hota hi nahin jurm-o-saza ka silsila

zindagī se baḌī sazā hī nahīñ

aur kyā jurm hai patā hī nahīñ

zindagi se baDi saza hi nahin

aur kya jurm hai pata hi nahin

aisā na ho gunāh kī daldal meñ jā phañsūñ

ai merī aarzū mujhe le chal sambhāl ke

aisa na ho gunah ki daldal mein ja phansun

ai meri aarzu mujhe le chal sambhaal ke

jaise an-dekhe ujāle kī koī dīvār ho

band ho jaatā hai kuchh duurī pe har ik rāstā

jaise an-dekhe ujale ki koi diwar ho

band ho jata hai kuchh duri pe har ek rasta

mausam haiñ do hī ishq ke sūrat koī bhī ho

haiñ us ke paas aa.ine hijr-o-visāl ke

mausam hain do hi ishq ke surat koi bhi ho

hain us ke pas aaine hijr-o-visal ke