بچھڑا کچھ اس ادا سے کہ رت ہی بدل گئی

اک شخص سارے شہر کو ویران کر گیا

خالدؔ میں بات بات پہ کہتا تھا جس کو جان

وہ شخص آخرش مجھے بے جان کر گیا

آسماں جھانک رہا ہے خالدؔ

چاند کمرے میں مرے اترا ہے

ناکام حسرتوں کے سوا کچھ نہیں رہا

دنیا میں اب دکھوں کے سوا کچھ نہیں رہا

آج کچھ رنگ دگر ہے مرے گھر کا خالدؔ

سوچتا ہوں یہ تری یاد ہے یا خود تو ہے

آج سے اک دوسرے کو قتل کرنا ہے ہمیں

تو مرا پیکر نہیں ہے میں ترا سایہ نہیں

آنکھ کس لفظ پہ بھر آئی ہے

کون سی بات پہ دل ٹوٹا ہے

تم خوش رہو ہماری دعا ہے تمام عمر

اپنی تو خیر جیسی بھی گزری گزر گئی

زخم رسنے لگا ہے پھر شاید

یاد اس نے کیا ہے پھر شاید

وہ تو گیا اب اپنی انا کو سمیٹ لے

اے غم گسار دست دعا کو سمیٹ لے