دیر لگی آنے میں تم کو شکر ہے پھر بھی آئے تو

آس نے دل کا ساتھ نہ چھوڑا ویسے ہم گھبرائے تو

اف وہ طوفان شباب آہ وہ سینہ تیرا

جسے ہر سانس میں دب دب کے ابھرتا دیکھا

دل پر چوٹ پڑی ہے تب تو آہ لبوں تک آئی ہے

یوں ہی چھن سے بول اٹھنا تو شیشہ کا دستور نہیں

جھوٹ ہے سب تاریخ ہمیشہ اپنے کو دہراتی ہے

اچھا میرا خواب جوانی تھوڑا سا دہرائے تو

چاہت کے بدلے میں ہم بیچ دیں اپنی مرضی تک

کوئی ملے تو دل کا گاہک کوئی ہمیں اپنائے تو

بے نیازانہ برابر سے گزرنے والے

تیز کچھ قلب کی رفتار ہوئی تھی کہ نہیں

جگر میں ٹیس لب ہنسنے پہ مجبور

کچھ ایسی ہی ہماری زندگی ہے

ڈوبنا ہی تھا جو کشتی کا مقدر یارب

آنکھ کے سامنے اے کاش نہ ساحل ہوتا

مجھ کو تنہا چھوڑنے والے تو نہ کہیں تنہا رہ جائے

جس پر تجھ کو ناز ہے اتنا اس کا نام زمانہ ہے

لوگ کہتے ہیں دعاؤں میں اثر ہوتا ہے

میری تقدیر بدل جائے تو میں بھی جانوں

تم چاندنی ہو پھول ہو نغمہ ہو شعر ہو

اللہ رے حسن ذوق مرے انتخاب کا