لا ینحل

زباں پہ مہر گدائی ہے کس سے بات کروں

حروف کاسۂ بے مایہ ہیں قلم کشکول

ضمیر بے حس و حرکت ہے زیست بے پہلو

شکن ہے سینۂ بے تہہ میں، آستین پہ جھول

میں خود طلسم کی پریوں سے بے کنار ہوا

کسے کہوں کہ مری روح کے دریچے کھول

میں اک سراب کی خواہش پہ بیچ آیا ہوں

تمام بادہ و ساغر تمام تشنہ لبی

حریم عقل میں جس کا کوئی جواز نہ تھا

نشاط دل تھی وہی زندگی کی بے سببی

اجڑ گئے مرے گلگشت میرے رکنا باد

مری دعائے سحر میری آہ نیم شبی

کہاں وہ دن تھے کہ پروائے ننگ و نام نہ تھی

کہاں یہ وقت کہ سایہ سنبھل کے چلتا ہے

مجھے کسی بھی تعین پہ اختیار نہیں

یہ کوئی اور مرے راستے بدلتا ہے

جنوں سے رسم نہ رکھوں تو جاں سلگتی ہے

طلب کا قرض اتاروں تو جسم جلتا ہے