la-yanhal

zabāñ pe muhr-e-gadā.ī hai kis se baat karūñ

hurūf kāsa-e-be-māya haiñ qalam kashkol

zamīr be-his-o-harkat hai ziist be-pahlū

shikan hai sīna-e-be-tah meñ āstīn pe jhol

maiñ ḳhud tilism kī pariyoñ se be-kanār huā

kise kahūñ ki mirī ruuh ke darīche khol

maiñ ik sarāb kī ḳhvāhish pe bech aayā huuñ

tamām bāda-o-sāġhar tamām tishna-labī

harīm-e-'aql meñ jis kā koī javāz na thā

nashāt-e-dil thī vahī zindagī kī be-sababī

ujaḌ gaye mire gul-gasht mere ruknā-bād

mirī du’ā-e-sahar merī āh-e-nīm-shabī

kahāñ vo din the ki parvā-e-nang-o-nām na thī

kahāñ ye vaqt ki saaya sañbhal ke chaltā hai

mujhe kisī bhī ta'ayyun pe iḳhtiyār nahīñ

ye koī aur mire rāste badaltā hai

junūñ se rasm na rakkhūñ to jaañ sulagtī hai

talab kā qarz utārūñ to jism jaltā hai

zaban pe muhr-e-gadai hai kis se baat karun

huruf kasa-e-be-maya hain qalam kashkol

zamir be-his-o-harkat hai zist be-pahlu

shikan hai sina-e-be-tah mein aastin pe jhol

main KHud tilism ki pariyon se be-kanar hua

kise kahun ki meri ruh ke dariche khol

main ek sarab ki KHwahish pe bech aaya hun

tamam baada-o-saghar tamam tishna-labi

harim-e-'aql mein jis ka koi jawaz na tha

nashat-e-dil thi wahi zindagi ki be-sababi

ujaD gaye mere gul-gasht mere rukna-baad

meri du’a-e-sahar meri aah-e-nim-shabi

kahan wo din the ki parwa-e-nang-o-nam na thi

kahan ye waqt ki saya sanbhal ke chalta hai

mujhe kisi bhi ta'ayyun pe iKHtiyar nahin

ye koi aur mere raste badalta hai

junun se rasm na rakkhun to jaan sulagti hai

talab ka qarz utarun to jism jalta hai