جب سے الفت کے زیر اثر ہو گئی

جب سے الفت کے زیر اثر ہو گئی

زندگی موت سے بے خبر ہو گئی

جب غزل میں کوئی حسن آیا نظر

یاد تازہ جناب جگر ہو گئی

پوچھتے ہیں وہ رخ کی شکن دیکھ کر

ختم کیسے ضیائے قمر ہو گئی

سارے عالم کو گھیرے تھیں تاریکیاں

آپ تشریف لائے سحر ہو گئی

شاخ سے ٹوٹتے ہی یہ کیا ہو گیا

پھول کی زندگی مختصر ہو گئی

کوئی تعریف اچھائیوں کی نہیں

اک خطا پہ جہاں کی نظر ہو گئی

گھر سے نکلے تھے ہم راحتیں ڈھونڈنے

دکھ سر راہ تھی ہم سفر ہو گئی

یہ وطن کیا بٹا کتنے انساں بٹے

ایک بستی ادھر کی ادھر ہو گئی

سادے کاغذ پہ میرا قلم چل پڑا

ہر تخیل بہار ظفرؔ ہو گئی