jab se ulfat ke zer-e-asar ho gai

jab se ulfat ke zer-e-asar ho ga.ī

zindagī maut se be-ḳhabar ho ga.ī

jab ġhazal meñ koī husn aayā nazar

yaad taaza janāb-e-jigar ho ga.ī

pūchhte haiñ vo ruḳh kī shikan dekh kar

ḳhatm kaise ziyā-e-qamar ho ga.ī

saare 'ālam ko ghere thiiñ tārīkiyāñ

aap tashrīf laa.e sahar ho ga.ī

shāḳh se TūTte hī ye kyā ho gayā

phuul kī zindagī muḳhtasar ho ga.ī

koī tā'rīf achchhā.iyoñ kī nahīñ

ik ḳhatā pe jahāñ kī nazar ho ga.ī

ghar se nikle the ham rāhateñ DhūñDne

dukh sar-e-rāh thī ham-safar ho ga.ī

ye vatan kyā baTā kitne insāñ baTe

ek bastī idhar kī udhar ho ga.ī

saade kāġhaz pe merā qalam chal paḌā

har taḳhayyul bahār-e-'zafar' ho ga.ī

jab se ulfat ke zer-e-asar ho gai

zindagi maut se be-KHabar ho gai

jab ghazal mein koi husn aaya nazar

yaad taza janab-e-jigar ho gai

puchhte hain wo ruKH ki shikan dekh kar

KHatm kaise ziya-e-qamar ho gai

sare 'alam ko ghere thin tarikiyan

aap tashrif lae sahar ho gai

shaKH se TuTte hi ye kya ho gaya

phul ki zindagi muKHtasar ho gai

koi ta'rif achchhaiyon ki nahin

ek KHata pe jahan ki nazar ho gai

ghar se nikle the hum rahaten DhunDne

dukh sar-e-rah thi ham-safar ho gai

ye watan kya baTa kitne insan baTe

ek basti idhar ki udhar ho gai

sade kaghaz pe mera qalam chal paDa

har taKHayyul bahaar-e-'zafar' ho gai