کونپلیں پھر پھوٹ آئیں شاخ پر کہنا اسے
کونپلیں پھر پھوٹ آئیں شاخ پر کہنا اسے
وہ نہ سمجھا ہے نہ سمجھے گا مگر کہنا اسے
وقت کا طوفان ہر اک شے بہا کر لے گیا
کتنی تنہا ہو گئی ہے رہگزر کہنا اسے
سربلندی کی قسم کھاتے تھے جس کی دو جہاں
جھک گیا ہے آج وہ مغرور سر کہنا اسے
راہ میں تیری گھڑی بھر کی رفاقت کے لیے
جل رہا ہے دھوپ میں پاگل شجر کہنا اسے
جگمگا اٹھے تھے تیری زلف کے سائے سے جو
منتظر ہیں آج پھر وہ بام و در کہنا اسے
رس رہا ہو خون دل سے لب مگر ہنستے رہے
کر گیا برباد مجھ کو یہ ہنر کہنا اسے
ہم سفر کی راہ میں تنہا سفر کرتے ہوئے
آ گیا ہے ختم ہونے کو سفر کہنا اسے
تال پر وحشت کی ہوں ویرانیاں رقصاں جہاں
موند کر شہزادؔ آنکھیں میرا گھر کہنا اسے
جس نے زخموں سے مرا شہزادؔ سینہ بھر دیا
مسکرا کر آج پیارے چارہ گر کہنا اسے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.