یہ تیری نوازش ہے عنایت ہے کرم ہے

یہ تیری نوازش ہے عنایت ہے کرم ہے

زندہ ہوں یہ احسان ترا کون سا کم ہے

شکوہ تو نہیں ہستی اگر وقف الم ہے

غم خوار نے منہ پھیر لیا مجھ سے ستم ہے

خود دار ہوں خود سر ہوں میں خود مست ہوں لیکن

تو سامنے آ جائے تو سر آج بھی خم ہے

سب تیری فسوں کار نظر کے ہیں کرشمے

دارا ہے سکندر ہے نہ جمشید نہ جم ہے

تقدیر بدل جائے تو حاصل بھی ہے تقدیر

آغاز کی پیشانی پہ انجام رقم ہے

ایسی ہی اداؤں پہ تو مر جاتے ہیں ہم لوگ

زندہ ہوں کہ قاتل کو مری موت کا غم ہے

یادوں کی گزر گاہوں میں اڑتے ہیں بگولے

سجدوں کا نشاں ہے نہ کوئی نقش قدم ہے

انداز قلندر کے نہ بے باک ہوں کیونکر

ہستی کا وجود اس کی نگاہوں میں عدم ہے

خالی تھی بڑی دیر سے یہ لوح زمانہ

اب آہ سحرگاہی کے ہاتھوں میں قلم ہے

سجدہ ہو تو میخانے کے دروازے پہ دل سے

ساقی کی نظر ہو تو یہی باب حرم ہے