ye teri nawazish hai inayat hai karam hai

ye terī navāzish hai 'ināyat hai karam hai

zinda huuñ ye ehsān tirā kaun sā kam hai

shikva to nahīñ hastī agar vaqf-e-alam hai

ġham-ḳhvār ne muñh pher liyā mujh se sitam hai

ḳhuddār huuñ ḳhud-sar huuñ maiñ ḳhud-mast huuñ lekin

tū sāmne aa jaa.e to sar aaj bhī ḳham hai

sab terī fusūñ-kār nazar ke haiñ karishme

daarā hai sikandar hai na jamshed na jam hai

taqdīr badal jaa.e to hāsil bhī hai taqdīr

āġhāz kī peshānī pe anjām raqam hai

aisī hī adāoñ pe to mar jaate haiñ ham log

zinda huuñ ki qātil ko mirī maut kā ġham hai

yādoñ kī guzargāhoñ meñ uḌte haiñ bagūle

sajdoñ kā nishāñ hai na koī naqsh-e-qadam hai

andāz qalandar ke na be-bāk hoñ kyūñkar

hastī kā vujūd is kī nigāhoñ meñ 'adam hai

ḳhālī thī baḌī der se ye lauh-e-zamāna

ab āh-e-sahar-gāhī ke hāthoñ meñ qalam hai

sajda ho to maiḳhāne ke darvāze pe dil se

saaqī kī nazar ho to yahī bāb-e-haram hai

ye teri nawazish hai 'inayat hai karam hai

zinda hun ye ehsan tera kaun sa kam hai

shikwa to nahin hasti agar waqf-e-alam hai

gham-KHwar ne munh pher liya mujh se sitam hai

KHuddar hun KHud-sar hun main KHud-mast hun lekin

tu samne aa jae to sar aaj bhi KHam hai

sab teri fusun-kar nazar ke hain karishme

dara hai sikandar hai na jamshed na jam hai

taqdir badal jae to hasil bhi hai taqdir

aaghaz ki peshani pe anjam raqam hai

aisi hi adaon pe to mar jate hain hum log

zinda hun ki qatil ko meri maut ka gham hai

yaadon ki guzargahon mein uDte hain bagule

sajdon ka nishan hai na koi naqsh-e-qadam hai

andaz qalandar ke na be-bak hon kyunkar

hasti ka wujud is ki nigahon mein 'adam hai

KHali thi baDi der se ye lauh-e-zamana

ab aah-e-sahar-gahi ke hathon mein qalam hai

sajda ho to maiKHane ke darwaze pe dil se

saqi ki nazar ho to yahi bab-e-haram hai