راستہ منزل مقصود کا دشوار بھی ہے

راستہ منزل مقصود کا دشوار بھی ہے

سر پہ لٹکی ہوئی اندیشوں کی دیوار بھی ہے

تو شناسائے حقیقت ہے یہ تسلیم مجھے

ہاں مگر پاس ترے جرأت اظہار بھی ہے

جو بھی آتا ہے نظر بھائی نظر آتا ہے

کوئی اس شہر میں یوسف کا خریدار بھی ہے

چار تنکوں کے لئے برق کو زحمت کیوں ہو

آشیاں جس پہ ہے وہ شاخ ثمر دار بھی ہے

بہہ رہا ہے مرے رستے میں لہو کا دریا

سامنے آنکھوں کے اک شعلے کی دیوار بھی ہے

ایک گرداب سے مر مر کے سفینہ نکلا

سر پہ طوفان بھی ہے سامنے منجدھار بھی ہے

کس سے پوچھوں گا میں اسباب تباہی واصفؔ

خانقاہوں میں کوئی صاحب اسرار بھی ہے