rasta manzil-e-maqsud ka dushwar bhi hai

rāsta manzil-e-maqsūd kā dushvār bhī hai

sar pe laTkī huī andeshoñ kī dīvār bhī hai

tū shanāsā-e-haqīqat hai ye taslīm mujhe

haañ magar paas tire jur.at-e-iz.hār bhī hai

jo bhī aatā hai nazar bhaa.ī nazar aatā hai

koī is shahr meñ yūsuf kā ḳharīdār bhī hai

chaar tinkoñ ke liye barq ko zahmat kyuuñ ho

āshiyāñ jis pe hai vo shāḳh samar-dār bhī hai

bah rahā hai mire raste meñ lahū kā dariyā

sāmne āñkhoñ ke ik sho'le kī dīvār bhī hai

ek girdāb se mar mar ke safīnā niklā

sar pe tūfān bhī hai sāmne mañjdhār bhī hai

kis se pūchhūñgā maiñ asbāb-e-tabāhī 'vāsif'

ḳhānqāhoñ meñ koī sāhib-e-asrār bhī hai

rasta manzil-e-maqsud ka dushwar bhi hai

sar pe laTki hui andeshon ki diwar bhi hai

tu shanasa-e-haqiqat hai ye taslim mujhe

han magar pas tere jurat-e-izhaar bhi hai

jo bhi aata hai nazar bhai nazar aata hai

koi is shahr mein yusuf ka KHaridar bhi hai

chaar tinkon ke liye barq ko zahmat kyun ho

aashiyan jis pe hai wo shaKH samar-dar bhi hai

bah raha hai mere raste mein lahu ka dariya

samne aankhon ke ek sho'le ki diwar bhi hai

ek girdab se mar mar ke safina nikla

sar pe tufan bhi hai samne manjdhaar bhi hai

kis se puchhunga main asbab-e-tabahi 'wasif'

KHanqahon mein koi sahib-e-asrar bhi hai