عالم کچھ اور ہے دل بے اختیار کا

عالم کچھ اور ہے دل بے اختیار کا

دیکھیں کہاں گزرتا ہے موسم بہار کا

جس نے فریب کھایا نہ ہو اعتبار کا

سمجھے گا لطف کیا وہ غم انتظار کا

میں اپنے آشیاں میں لگا دوں گا خود ہی آگ

اٹھا اگر سوال چمن کے وقار کا

کافی ہے تیری یاد رفاقت کے واسطے

احسان کیوں اٹھائیں کسی غم گسار کا

جو کہکشاں کے نام سے روشن ہے چرخ پر

کیا کہئے راستہ ہے وہ کس کے دیار کا

جس کو ہے یہ خبر کہ ہے غم جزو زندگی

کیوں شکوہ سنج ہو وہ غم روزگار کا

سمجھا کیا زمانہ جسے اپنی داستاں

افسانہ تھا ظفرؔ وہ دل سوگوار کا