شعبدہ تھا یا حقیقت ذہن تاریکی میں تھا

شعبدہ تھا یا حقیقت ذہن تاریکی میں تھا

جل رہا ہے آگ میں جنگل دھواں پانی میں تھا

سبز ٹہنی پر جما تھا قطرۂ خون گلاب

لوگ یہ سمجھے کہ سونے کا اثر مٹی میں تھا

جنبش موج ہوا سے چھڑ گیا ساز شمیم

ورنہ ہر گل مضطرب زندان خاموشی میں تھا

کھل گئیں جب انگلیاں کتنی پشیمانی ہوئی

بند اک پھیلا ہوا صحرا مری مٹھی میں تھا

بزم میں آ کر بجھا میری طبیعت کا چراغ

میں کہ صدیوں سے فروزاں کنج تنہائی میں تھا

چھو لیا جب میں نے وہ پیکر تو میلا ہو گیا

اب کھلا یہ راز چاہت کا مزا دوری میں تھا

میں نے جب صدیقؔ دوڑائی زمانوں پر نظر

اک جہاں سمٹا ہوا لمحے کی پہنائی میں تھا