shobda tha ya haqiqat zehn tariki mein tha

sho'bda thā yā haqīqat zehn tārīkī meñ thā

jal rahā hai aag meñ jangal dhuāñ paanī meñ thā

sabz Tahnī par jamā thā qatra-e-ḳhūn-e-gulāb

log ye samjhe ki sone kā asar miTTī meñ thā

jumbish-e-mauj-e-havā se chhiḌ gayā sāz-e-shamīm

varna har gul muztarib zindān-e-ḳhāmoshī meñ thā

khul ga.iiñ jab uñgliyāñ kitnī pashemānī huī

band ik phailā huā sahrā mirī muTThī meñ thā

bazm meñ aa kar bujhā merī tabī'at kā charāġh

maiñ ki sadiyoñ se farozāñ kunj-e-tanhā.ī meñ thā

chhū liyā jab maiñ ne vo paikar to mailā ho gayā

ab khulā ye raaz chāhat kā mazā duurī meñ thā

maiñ ne jab 'siddīq' dauḌā.ī zamānoñ par nazar

ik jahāñ simTā huā lamhe kī pahnā.ī meñ thā

sho'bda tha ya haqiqat zehn tariki mein tha

jal raha hai aag mein jangal dhuan pani mein tha

sabz Tahni par jama tha qatra-e-KHun-e-gulab

log ye samjhe ki sone ka asar miTTi mein tha

jumbish-e-mauj-e-hawa se chhiD gaya saz-e-shamim

warna har gul muztarib zindan-e-KHamoshi mein tha

khul gain jab ungliyan kitni pashemani hui

band ek phaila hua sahra meri muTThi mein tha

bazm mein aa kar bujha meri tabi'at ka charagh

main ki sadiyon se farozan kunj-e-tanhai mein tha

chhu liya jab main ne wo paikar to maila ho gaya

ab khula ye raaz chahat ka maza duri mein tha

main ne jab 'siddiq' dauDai zamanon par nazar

ek jahan simTa hua lamhe ki pahnai mein tha