جمود آب و گل جو ہے وہ جاتا ہے کہاں مجھ سے
جمود آب و گل جو ہے وہ جاتا ہے کہاں مجھ سے
عبث فریاد کرتا ہے درائے کارواں مجھ سے
نظر نظارہ خو میری جبیں ہنگامہ جو میری
نمایاں ہے مرا شوق سجود آستاں مجھ سے
مرے دل نے مری آنکھوں سے رکھا تجھ کو پوشیدہ
تری جب بات آئی رک گئی میری زباں مجھ سے
تم اپنی انقلاب انگیزیوں کی داستاں سن لو
اگر سن لو کسی دن آ کے میری داستاں مجھ سے
خبر کس کو نہیں ہے تیری شان بے نیازی کی
نہیں معلوم پھر کیوں ہے زمانہ بدگماں مجھ سے
کسی صورت قفس میں زندگی اپنی گزر جاتی
سلوک اچھا نہیں کرتی ہے یاد آشیاں مجھ سے
سر محفل چرانا آنکھ کا تھا ایک افسانہ
وہ تو نے کہہ دیا خود جو نہ ہوتا تھا بیاں مجھ سے
نیاز بندگی کو دیکھ کر یہ شان استغنا
بتا کیا چاہتا ہے تیرا ناز جاں ستاں مجھ سے
کیا تھا روح غالبؔ سے جو میں نے کسب فن وحشتؔ
سخنور سیکھتے ہیں آج انداز بیاں مجھ سے
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.