مجھ سے نہ ہوئی نمائش غم

مجھ سے نہ ہوئی نمائش غم

تھی پھول کے رخ پہ جیسے شبنم

کون آیا ہے میری چشم تر میں

یہ کیسے لرز رہا ہے عالم

غنچے بھی چٹک کے بعض اوقات

کرتے ہیں مرا مزاج برہم

وہ بات جو دل جلا رہی ہے

اس بات میں کیف بھی ہے کم کم

دنیا کے لیے تبسم لب

اپنے لیے آتش جہنم

دکھ میرا سفینہ بن گیا ہے

ساحل مرا درد درد پیہم

آنکھیں ہیں مزار حسرتوں کے

آنسو ہیں چراغ وہ بھی مدھم

امروز پیام ہے اجل کا

فردا ہے دوام حسرت و رم

ہے شہر میں آج پھر چراغاں

گویا ہوئی میری چشم پرنم

دنیا نے سنے ہیں شعر میرے

اپنوں نے کیا ہے میرا ماتم