mujhse na hui numaish-e-gham

mujh se na huī numā.ish-e-ġham

thī phuul ke ruḳh pe jaise shabnam

kaun aayā hai merī chashm-e-tar meñ

ye kaise laraz rahā hai 'ālam

ġhunche bhī chaTak ke baa'z auqāt

karte haiñ mirā mizāj barham

vo baat jo dil jalā rahī hai

us baat meñ kaif bhī hai kam kam

duniyā ke liye tabassum-e-lab

apne liye ātish-e-jahannam

dukh merā safīnā ban gayā hai

sāhil mirā dard dard-e-paiham

āñkheñ haiñ mazār hasratoñ ke

aañsū haiñ charāġh vo bhī maddham

imroz payām hai ajal kā

fardā hai davām-e-hasrat-o-ram

hai shahr meñ aaj phir charāġhāñ

goyā huī merī chashm-e-pur-nam

duniyā ne sune haiñ she'r mere

apnoñ ne kiyā hai merā mātam

mujh se na hui numaish-e-gham

thi phul ke ruKH pe jaise shabnam

kaun aaya hai meri chashm-e-tar mein

ye kaise laraz raha hai 'alam

ghunche bhi chaTak ke ba'z auqat

karte hain mera mizaj barham

wo baat jo dil jala rahi hai

us baat mein kaif bhi hai kam kam

duniya ke liye tabassum-e-lab

apne liye aatish-e-jahannam

dukh mera safina ban gaya hai

sahil mera dard dard-e-paiham

aankhen hain mazar hasraton ke

aansu hain charagh wo bhi maddham

imroz payam hai ajal ka

farda hai dawam-e-hasrat-o-ram

hai shahr mein aaj phir charaghan

goya hui meri chashm-e-pur-nam

duniya ne sune hain she'r mere

apnon ne kiya hai mera matam