Sher on Deedaar

ḳhudārā ik nigāh-e-nāz hī se dekh lo ham ko

garebāñ phāḌne ko aaj ham tayyār baiThe haiñ

KHudara ek nigah-e-naz hi se dekh lo hum ko

gareban phaDne ko aaj hum tayyar baiThe hain

mahaz ḳhvāboñ ḳhayāloñ meñ tirā dīdār ho kab tak

haqīqat meñ bhī tujh se āshnā.ī chāhte haiñ ham

mahaz KHwabon KHayalon mein tera didar ho kab tak

haqiqat mein bhi tujh se aashnai chahte hain hum

husn hotā hai kisī shai kā koī apnā hī

aur phir dekhne vaale kī nazar hotī hai

husn hota hai kisi shai ka koi apna hi

aur phir dekhne wale ki nazar hoti hai

aa jaa.eñ vaqt-e-naz.a to maiñ un ko dekh luuñ

armān koī dil meñ ab is ke sivā nahīñ

aa jaen waqt-e-naza to main un ko dekh lun

arman koi dil mein ab is ke siwa nahin

tumheñ jo dekh le ik baar dekhtā rah jaa.e

tumhārā husn mohabbat kā isti'āra hai

tumhein jo dekh le ek bar dekhta rah jae

tumhaara husn mohabbat ka isti'ara hai

mujhe to terī barbādī bhī barbādī nahīñ lagtī

ki maiñ ne vo bhī dekhā hai jo hai barbād se aage

mujhe to teri barbaadi bhi barbaadi nahin lagti

ki main ne wo bhi dekha hai jo hai barbaad se aage

tum to phir ġhair ho tum se to shikāyat kaisī

mere apne mujhe ġhairoñ kī tarah dekhte haiñ

tum to phir ghair ho tum se to shikayat kaisi

mere apne mujhe ghairon ki tarah dekhte hain

husn-e-dilkash ise kahte haiñ ki ham saarī umr

un ko dekhā kiye dīdār kī hasrat na ga.ī

husn-e-dilkash ise kahte hain ki hum sari umr

un ko dekha kiye didar ki hasrat na gai

tumhārī diid kī ḳhvāhish liye vo baiThe haiñ

tumhārī diid hī bīmār kī shifā Thahrī

tumhaari did ki KHwahish liye wo baiThe hain

tumhaari did hi bimar ki shifa Thahri

khiḌkī ke apnī us ne bhī parde girā liye

mere bhī rāste kī rukāvaT nahīñ rahī

khiDki ke apni us ne bhi parde gira liye

mere bhi raste ki rukawaT nahin rahi

zamāne ko tamannā hai tirā dīdār karne kī

mujhe ye fikr hai mujh ko mirā dīdār ho jaa.e

zamane ko tamanna hai tera didar karne ki

mujhe ye fikr hai mujh ko mera didar ho jae

merī nigāh-e-shauq kā jaadū bhī kam nahīñ

āñkhoñ meñ āñkheñ Daal ke dekhā na kījiye

meri nigah-e-shauq ka jadu bhi kam nahin

aankhon mein aankhen Dal ke dekha na kijiye

tujhe ik baar kyā 'vāsif' ne dekhā

tujhe phir dekhne kī aarzū hai

tujhe ek bar kya 'wasif' ne dekha

tujhe phir dekhne ki aarzu hai

ḳhāna hai sail se ḳhū-karda-e-dīdār hunūz

dūrbīñ dar-zada hai raḳhna-e-dīvār hunūz

KHana hai sail se KHu-karda-e-didar hunuz

durbin dar-zada hai raKHna-e-diwar hunuz

dīdār-e-zul-jalāl pe āmāda ho gayā

kyā hausla nigāh-e-dil-e-nā-tavāñ kā thā

didar-e-zul-jalal pe aamada ho gaya

kya hausla nigah-e-dil-e-na-tawan ka tha

tire rang-o-bū ko bhī dekhte na ḳhayāl thā na majāl thī

jo sakat milī tujhe dekhne kī to rang-o-bū se nikal ga.e

tere rang-o-bu ko bhi dekhte na KHayal tha na majal thi

jo sakat mili tujhe dekhne ki to rang-o-bu se nikal gae

ho ga.ī diid maut se pahle

aaj armāñ nikal ga.e saare

ho gai did maut se pahle

aaj arman nikal gae sare