انہیں اپنے گداز دل سے اندازہ تھا اوروں کا

جب انسانوں کے دل دیکھے تو انسانوں کے دل ٹوٹے

تو کوئی سوکھا ہوا پتہ نہیں ہے کہ جسے

جس طرف موج ہوا چاہے اڑا کر لے جائے

ضیاؔ وہ زندگی کیا زندگی ہے

جسے خود موت بھی ٹھکرا گئی ہو

وقت بے مہر ہے اس فرصت کمیاب میں تم

میری آنکھوں میں رہو خواب مجسم کی طرح

اتنا سوچا تجھے کہ دنیا کو

ہم نے تیری نگاہ سے دیکھا

وہ شاخ بنے سنورے وہ شاخ پھلے پھولے

جس شاخ پہ دھوپ آئے جس شاخ کو نم پہنچے

اب اس کا چارہ ہی کیا کہ اپنی طلب ہی لا انتہا تھی ورنہ

وہ آنکھ جب بھی اٹھی ہے دامان درد پھولوں سے بھر گئی ہے

برا نہ مان ضیاؔ اس کی صاف گوئی کا

جو درد مند بھی ہے اور بے ادب بھی نہیں

مشکلیں دل میں نئی شمعیں جلا دیتی ہیں

غم سے بجھ جانا تو درویشوں کا دستور نہیں

ہمت ہے تو بلند کر آواز کا علم

چپ بیٹھنے سے حل نہیں ہونے کا مسئلہ

میں آفتاب کو کیسے دکھاؤں تاریکی

تجھے میں کیسے بتاؤں کہ کیا ہے تنہائی

وہ خواب کیا تھا کہ جس کی حیات ہے تعبیر

وہ جرم کیا تھا کہ جس کی سزا ہے تنہائی

دیکھ پھولوں سے لدے دھوپ نہائے ہوئے پیڑ

ہنس کے کہتے ہیں گزاری ہے خزاں بھی ہم نے

ہاں مجھ پہ ستم بھی ہیں بہت وقت کے لیکن

کچھ وقت کی ہیں مجھ پہ عنایات وہ تم ہو

رنگ باتیں کریں اور باتوں سے خوشبو آئے

درد پھولوں کی طرح مہکے اگر تو آئے

کیسے دکھ کتنی چاہ سے دیکھا

تجھے کس کس نگاہ سے دیکھا

تیرا غم بھی نہ ہو تو کیا جینا

کچھ تسلی ہے درد ہی سے مجھے

ان کہی بات کے سو روپ کہی بات کا ایک

کبھی سن وہ بھی جو منت کش گویائی نہیں

عشق میں بھی کوئی انجام ہوا کرتا ہے

عشق میں یاد ہے آغاز ہی آغاز مجھے

اظہار نارسا سہی وہ صورت جمال

آئینۂ خیال میں بھی ہو بہو نہ تھی

تیرے دکھ کو پا کر ہم تو اپنا دکھ بھی بھول گئے

کس کو خبر تھی تیری خموشی تہہ در تہہ اک طوفاں ہے

یہ آنسو یہ پشیمانی کا اظہار

مجھے اک بار پھر بہکا گئی ہو

اب جو روٹھے تو جاں پہ بنتی ہے

خوش ہوا مجھ سے بے سبب کوئی

اب یہ آنکھیں کسی تسکین سے تابندہ نہیں

میں نے رفتہ سے یہ جانا ہے کہ آئندہ نہیں

ابر آوارہ سے مجھ کو ہے وفا کی امید

برق بے تاب سے شکوہ ہے کہ پائندہ نہیں