unheñ apne gudāz-e-dil se andāza thā auroñ kā

jab insānoñ ke dil dekhe to insānoñ ke dil TuuTe

unhen apne gudaz-e-dil se andaza tha auron ka

jab insanon ke dil dekhe to insanon ke dil TuTe

tū koī sūkhā huā patta nahīñ hai ki jise

jis taraf mauj-e-havā chāhe uḌā kar le jaa.e

tu koi sukha hua patta nahin hai ki jise

jis taraf mauj-e-hawa chahe uDa kar le jae

'ziyā' vo zindagī kyā zindagī hai

jise ḳhud maut bhī Thukrā ga.ī ho

'ziya' wo zindagi kya zindagi hai

jise KHud maut bhi Thukra gai ho

vaqt be-mehr hai is fursat-e-kamyāb meñ tum

merī āñkhoñ meñ raho ḳhvāb-e-mujassam kī tarah

waqt be-mehr hai is fursat-e-kamyab mein tum

meri aankhon mein raho KHwab-e-mujassam ki tarah

itnā sochā tujhe ki duniyā ko

ham ne terī nigāh se dekhā

itna socha tujhe ki duniya ko

hum ne teri nigah se dekha

vo shāḳh bane-sañvre vo shāḳh phale-phūle

jis shāḳh pe dhuup aa.e jis shāḳh ko nam pahuñche

wo shaKH bane-sanwre wo shaKH phale-phule

jis shaKH pe dhup aae jis shaKH ko nam pahunche

ab is kā chāra hī kyā ki apnī talab hī lā-intihā thī varna

vo aañkh jab bhī uThī hai dāmān-e-dard phūloñ se bhar ga.ī hai

ab is ka chaara hi kya ki apni talab hi la-intiha thi warna

wo aankh jab bhi uThi hai daman-e-dard phulon se bhar gai hai

burā na maan 'ziyā' us kī sāf-goī kā

jo dard-mand bhī hai aur be-adab bhī nahīñ

bura na man 'ziya' us ki saf-goi ka

jo dard-mand bhi hai aur be-adab bhi nahin

mushkileñ dil meñ na.ī sham.eñ jalā detī haiñ

ġham se bujh jaanā to durveshoñ kā dastūr nahīñ

mushkilen dil mein nai shamen jala deti hain

gham se bujh jaana to durweshon ka dastur nahin

himmat hai to buland kar āvāz kā alam

chup baiThne se hal nahīñ hone kā mas.ala

himmat hai to buland kar aawaz ka alam

chup baiThne se hal nahin hone ka masala

maiñ āftāb ko kaise dikhā.ūñ tārīkī

tujhe maiñ kaise batā.ūñ ki kyā hai tanhā.ī

main aaftab ko kaise dikhaun tariki

tujhe main kaise bataun ki kya hai tanhai

vo ḳhvāb kyā thā ki jis kī hayāt hai ta.abīr

vo jurm kyā thā ki jis kī sazā hai tanhā.ī

wo KHwab kya tha ki jis ki hayat hai tabir

wo jurm kya tha ki jis ki saza hai tanhai

dekh phūloñ se lade dhuup nahā.e hue peḌ

hañs ke kahte haiñ guzārī hai ḳhizāñ bhī ham ne

dekh phulon se lade dhup nahae hue peD

hans ke kahte hain guzari hai KHizan bhi hum ne

haañ mujh pe sitam bhī haiñ bahut vaqt ke lekin

kuchh vaqt kī haiñ mujh pe ināyāt vo tum ho

han mujh pe sitam bhi hain bahut waqt ke lekin

kuchh waqt ki hain mujh pe inayat wo tum ho

rañg bāteñ kareñ aur bātoñ se ḳhushbū aa.e

dard phūloñ kī tarah mahke agar tū aa.e

rang baaten karen aur baaton se KHushbu aae

dard phulon ki tarah mahke agar tu aae

kaise dukh kitnī chaah se dekhā

tujhe kis kis nigāh se dekhā

kaise dukh kitni chah se dekha

tujhe kis kis nigah se dekha

terā ġham bhī na ho to kyā jiinā

kuchh tasallī hai dard hī se mujhe

tera gham bhi na ho to kya jina

kuchh tasalli hai dard hi se mujhe

un kahī baat ke sau ruup kahī baat kā ek

kabhī sun vo bhī jo minnat-kash-e-goyā.ī nahīñ

un kahi baat ke sau rup kahi baat ka ek

kabhi sun wo bhi jo minnat-kash-e-goyai nahin

ishq meñ bhī koī anjām huā kartā hai

ishq meñ yaad hai āġhāz hī āġhāz mujhe

ishq mein bhi koi anjam hua karta hai

ishq mein yaad hai aaghaz hi aaghaz mujhe

iz.hār nā-rasā sahī vo sūrat-e-jamāl

ā.īna-e-ḳhayāl meñ bhī hū-ba-hū na thī

izhaar na-rasa sahi wo surat-e-jamal

aaina-e-KHayal mein bhi hu-ba-hu na thi

tere dukh ko pā kar ham to apnā dukh bhī bhuul ga.e

kis ko ḳhabar thī terī ḳhamoshī tah-dar-tah ik tūfāñ hai

tere dukh ko pa kar hum to apna dukh bhi bhul gae

kis ko KHabar thi teri KHamoshi tah-dar-tah ek tufan hai

ye aañsū ye pashemānī kā iz.hār

mujhe ik baar phir bahkā ga.ī ho

ye aansu ye pashemani ka izhaar

mujhe ek bar phir bahka gai ho

ab jo rūThe to jaañ pe bantī hai

ḳhush huā mujh se be-sabab koī

ab jo ruThe to jaan pe banti hai

KHush hua mujh se be-sabab koi

ab ye āñkheñ kisī taskīn se tābinda nahīñ

maiñ ne rafta se ye jaanā hai ki ā.inda nahīñ

ab ye aankhen kisi taskin se tabinda nahin

main ne rafta se ye jaana hai ki aainda nahin

abr-e-āvāra se mujh ko hai vafā kī ummīd

barq-e-betāb se shikva hai ki pā.inda nahīñ

abr-e-awara se mujh ko hai wafa ki ummid

barq-e-betab se shikwa hai ki painda nahin