kisī sabab se agar boltā nahīñ huuñ maiñ

to yuuñ nahīñ ki tujhe sochtā nahīñ huuñ maiñ

kisi sabab se agar bolta nahin hun main

to yun nahin ki tujhe sochta nahin hun main

ham ne us chehre ko bāñdhā nahīñ mahtāb-misāl

ham ne mahtāb ko us ruḳh ke mumāsil bāñdhā

hum ne us chehre ko bandha nahin mahtab-misal

hum ne mahtab ko us ruKH ke mumasil bandha

ḳhudā! sila de duā kaa, mohabbatoñ ke ḳhudā

ḳhudā! kisī ne kisī ke liye duā kī thī

KHuda! sila de dua ka, mohabbaton ke KHuda

KHuda! kisi ne kisi ke liye dua ki thi

mohabbat aur ibādat meñ farq to hai naañ

so chhīn lī hai tirī dostī mohabbat ne

mohabbat aur ibaadat mein farq to hai nan

so chhin li hai teri dosti mohabbat ne

mire vajūd ke andar mujhe talāsh na kar

ki is makān meñ aksar rahā nahīñ huuñ maiñ

mere wajud ke andar mujhe talash na kar

ki is makan mein aksar raha nahin hun main

gher letī hai koī zulf, koī bū-e-badan

jaan kar koī giraftār nahīñ hotā yaar

gher leti hai koi zulf, koi bu-e-badan

jaan kar koi giraftar nahin hota yar

ka.ī dinoñ se mire saath saath chaltī hai

koī udaas sī ThanDī sī koī parchhā.īñ

kai dinon se mere sath sath chalti hai

koi udas si ThanDi si koi parchhain

maiñ tum ko ḳhud se judā kar ke kis tarah dekhūñ

ki maiñ bhī ''tum'' huuñ, koī dūsrā nahīñ huuñ maiñ

main tum ko KHud se juda kar ke kis tarah dekhun

ki main bhi tum hun, koi dusra nahin hun main

tū mujh se mere zamānoñ kā pūchhtī hai to sun!

tirā junūñ, tirā saudā, tirī talab, tirī yaad

tu mujh se mere zamanon ka puchhti hai to sun!

tera junun, tera sauda, teri talab, teri yaad

aañkh jhapkī thī bas ik lamhe ko aur is ke ba.ad

maiñ ne DhūñDā hai tujhe zindagī sahrā sahrā

aankh jhapki thi bas ek lamhe ko aur is ke baad

main ne DhunDa hai tujhe zindagi sahra sahra

ik ḳhalā, ek lā-intihā aur maiñ

kitne tanhā haiñ merā ḳhudā aur maiñ

ek KHala, ek la-intiha aur main

kitne tanha hain mera KHuda aur main

savād-e-hijr meñ rakkhā huā diyā huuñ maiñ

tujhe ḳhabar nahīñ kis aag meñ jalā huuñ maiñ

sawad-e-hijr mein rakkha hua diya hun main

tujhe KHabar nahin kis aag mein jala hun main

yahī charāġh hai sab kuchh ki dil kaheñ jis ko

agar ye bujh gayā to aadmī bhī parchhā.īñ

yahi charagh hai sab kuchh ki dil kahen jis ko

agar ye bujh gaya to aadmi bhi parchhain

abhī chhuTī nahīñ jannat kī dhuul paañv se

hanūz farsh-e-zamīñ par nayā nayā huuñ maiñ

abhi chhuTi nahin jannat ki dhul panw se

hanuz farsh-e-zamin par naya naya hun main