tum nahin samjhoge

be-talab manzileñ

be-irāda safar

ik masāfat hai jo ibtidā se pare

intihā se alag

vaqt se māvarā

apnī āvārgī kā na koī sabab hai na koī sirā

ek ḳhud-rau udāsī

malāmat-zada aarzū kī numū

jhilmilāte dukhoñ kī vo bahtī huī aabjū

hasratoñ kā ye be-rabt juġhrāfiya

jān-levā ḳhayāloñ kī āmāj-gāh

apne ḳhvāboñ meñ in ke sivā aur rakkhā hai kyā

chilchilātī thakan

chirmirātā badan

mom sūrat Tapakte pasīne kī būñdeñ

tanaffus kā madd-o-jazar

an-kiye faisloñ kā zarar is qadar

is qadar shauq-e-āvārgī kis liye

kis liye ek be-nām jazbe ke isrār par

zindagī mahz ḳhud-kār ziine ke mānind chaltī rahī

hāshiye pe kināra-kashī kaise mumkin huī

dā.era-vār chalne kī 'ādat kahāñ se paḌī

koī mehvar nahīñ aur balā kī kashish

kuchh na kuchh bhed hai bar-sabīl-e-ḳhalish

maiñ samajh jā.ūñgā

be-talab manzilen

be-irada safar

ek masafat hai jo ibtida se pare

intiha se alag

waqt se mawara

apni aawargi ka na koi sabab hai na koi sira

ek KHud-rau udasi

malamat-zada aarzu ki numu

jhilmilate dukhon ki wo bahti hui aabju

hasraton ka ye be-rabt jughrafiya

jaan-lewa KHayalon ki aamaj-gah

apne KHwabon mein in ke siwa aur rakkha hai kya

chilchilati thakan

chirmiraata badan

mom surat Tapakte pasine ki bunden

tanaffus ka madd-o-jazar

an-kiye faislon ka zarar is qadar

is qadar shauq-e-awargi kis liye

kis liye ek be-nam jazbe ke israr par

zindagi mahz KHud-kar zine ke manind chalti rahi

hashiye pe kinara-kashi kaise mumkin hui

daera-war chalne ki 'adat kahan se paDi

koi mehwar nahin aur bala ki kashish

kuchh na kuchh bhed hai bar-sabil-e-KHalish

main samajh jaunga