ان کی خاطر جیوں ان کی خاطر مروں مجھ کو اس کے سوا کچھ نہیں چاہیے

ان کی خاطر جیوں ان کی خاطر مروں مجھ کو اس کے سوا کچھ نہیں چاہیے

آخری سانس تک نام ان کا جپوں مجھ کو اس کے سوا کچھ نہیں چاہیے

بے قراری کی ہر چال ناکام ہے کیا بتاؤں مجھے کتنا آرام ہے

آپ کی یاد ہے میرے دل کا سکوں مجھ کو اس کے سوا کچھ نہیں چاہیے

اہل دنیا جو کہتے ہیں کہتے رہیں طعن و تشنیع کرتے ہیں کرتے رہیں

جیسا وہ چاہتے ہیں میں ویسا بنوں مجھ کو اس کے سوا کچھ نہیں چاہیے

خاک نام و نمود و نمائش مرے پاؤں کو گرد آلود کرنے نہ پائے

صرف ان کے لئے ہی میں نعتیں کہوں مجھ کو اس کے سوا کچھ نہیں چاہیے

کس لئے نام و رتبے کی خواہش کروں کیوں میں اپنی تباہی کے پیچھے پڑوں

کیا یہ کم ہے کہ میں ان کی امت میں ہوں مجھ کو اس کے سوا کچھ نہیں چاہیے

ان کی مدح و ثنا میں گزرتی رہے زندگی کا اثاثہ ٹھکانے لگے

حشر میں سرخ روئی کا ساماں کروں مجھ کو اس کے سوا کچھ نہیں چاہیے

موت کے بعد جو ساعت دید ہے در حقیقت وہ میرے لئے عید ہے

شوق دیدار ہو لمحہ لمحہ فزوں مجھ کو اس کے سوا کچھ نہیں چاہیے

قبر یا حشر یا وقت میزان ہو حوض کوثر ہو یا منزل پل صراط

ہر جگہ آپ کے زیر سایہ رہوں مجھ کو اس کے سوا کچھ نہیں چاہیے

ہے دریدہ لباس تخیل اگر تو یہ غم کی علامت نہیں ہے سحرؔ

یاد جاناں کی سوئی سے اس کو سیوں مجھ کو اس کے سوا کچھ نہیں چاہیے