کب ہوا تاراج برق بے اماں کیونکر ہوا

کب ہوا تاراج برق بے اماں کیونکر ہوا

یہ نہ پوچھو مجھ سے برباد آشیاں کیونکر ہوا

جزو میں کیونکر الہی آ گئے انداز کل

قطرہ طوفاں زار بحر بے کراں کیونکر ہوا

ان کا جلوہ تو ازل سے ہے حجاب اندر حجاب

باعث ہنگامۂ کون و مکاں کیونکر ہوا

جس کی ماہیت سے ہے ذہن ملائک بے خبر

آشنا اس راز سے پیر مغاں کیونکر ہوا

اے کہ تیرا حسن میرے دل میں ہے خلوت نشیں

برگ برگ لالۂ و گل سے عیاں کیونکر ہوا

ایک مشت خاک سے افزوں نہیں میرا وجود

سوچتا ہوں حامل بار گراں کیونکر ہوا

میں کہ تھے ہفت آسماں چکر میں رفعت سے مری

پائمال گردش ہفت آسماں کیوں کر ہوا

میں کہ تھی میرے لئے پہنائی افلاک تنگ

حیرتی ہوں قانع یک خاک داں کیونکر ہوا

میں کہ تھی تخلیق میری خواجگی کو دہر کی

پائے بند احترام این و آں کیونکر ہوا

تھا میں صحرائے عدم میں صورت کنز نہاں

عالم ہستی میں خاک رائیگاں کیونکر ہوا

بھا گئی کیوں فطرت آزاد کو پا بستگی

آدمی مانوس زنجیر گراں کیونکر ہوا

اصل ہی جب کچھ نہیں سود و زیان دہر کی

گرم یہ ہنگامۂ سود و زیاں کیونکر ہوا

ساز گیتی میں نہیں گر غیر از آہنگ حق

ملتوں میں فرق ناقوس و اذاں کیونکر ہوا

تو کہاں اے غیرت مہر درخشاں ہم کہاں

خاکساروں پر محبت کا گماں کیونکر ہوا

جانتے تھے اہل تقوی سے تجھے ہم اے نہال

یہ بتا سرخیل رندان جہاں کیونکر ہوا