ایسا بھی کہیں دیکھا ہے منظر اسے کہنا

ایسا بھی کہیں دیکھا ہے منظر اسے کہنا

صحرا ہے مری آنکھ کے اندر اسے کہنا

تجھ کو بھی کوئی شک ہے تو پھر آ میں دکھاؤں

شاہوں میں بھی بیٹھے ہیں گداگر اسے کہنا

کیسے میں کہوں چہرہ وہ ایسا ہے کہ جیسے

پونم کے حسیں چاند کا منظر اسے کہنا

اب اس کو مرے لمس کی خوشبو نہیں ملنی

اب عود لگائے کہ وہ عنبر اسے کہنا

ہوتا ہے کوئی خوف نہ ڈر اس کو کسی کا

اڑتا ہے ہواؤں میں قلندر اسے کہنا

تیرے ہی طرفدار تری سمت بڑھیں گے

ہاتھوں میں اٹھائے ہوئے خنجر اسے کہنا

ہر بات کو سہہ لیتا ہوں چپ چاپ میں ہنس کر

جیسے کہ مرا دل ہو سمندر اسے کہنا