آنکھیں بھی دل کی ہوتی ہیں غماز دیکھنا

آنکھیں بھی دل کی ہوتی ہیں غماز دیکھنا

غیروں پہ کھل نہ جائے کہیں راز دیکھنا

جو دشمن بہار تھے گل پوش ہو گئے

کانٹوں پہ چل رہے ہیں چمن ساز دیکھنا

تنہائیوں کی کون سی منزل پہ آ گئی

ہے اجنبی سی اپنی ہی آواز دیکھنا

مانا کہ بول بالا ابھی ظلمتوں کا ہے

چمکے افق تو صبح کے انداز دیکھنا

شاہین کو بھلا کسی آنگن سے کیا غرض

دے آسمان پھر مری پرواز دیکھنا

جس نے زبان کاٹ دی آواز چھین لی

ہاتھوں میں دے گیا وہی اک ساز دیکھنا

پتھر کو پھول پھول کو پتھر بنا دیا

اس کی نگاہ ناز کا اعجاز دیکھنا

کل بھی حسین اور جواں تھی غزل علیؔ

کس رنگ میں ہے آج یہ شہناز دیکھنا