ابھرے کوئی گلی کوئی رستہ دکھائی دے

ابھرے کوئی گلی کوئی رستہ دکھائی دے

دل کے غموں کا کچھ تو مداوا دکھائی دے

تحریر اس کی دیکھ کے یوں خوش ہوا ہے دل

پیاسے کو جیسے دور سے دریا دکھائی دے

کیا سوچ کر نظارۂ کون و مکاں کریں

جب زندگی ہی اپنی تماشا دکھائی دے

شہر صنم میں گرمئ بازار دیکھ کر

ہر شخص چاہتا ہے سجیلا دکھائی دے

اس درجہ ہے اداس دل زار شام ہجر

جھونکا خنک ہوا کا دلاسا دکھائی دے

پھرتے ہیں اس خیال سے ہم کو بہ کو فضیلؔ

شاید کہیں وہ چاند سا چہرا دکھائی دے