بڑھائیے نہ زمانے سے رسم و راہ بہت

بڑھائیے نہ زمانے سے رسم و راہ بہت

پری جمالوں کے ہوتے ہیں خیر خواہ بہت

ستائش لب و رخسار کچھ خطا تو نہ تھی

ذرا سی بات پہ بگڑے وہ خواہ مخواہ بہت

رخ و جبیں پہ جو ان کے کبھی نظر کرتے

نہ آب و تاب دکھاتے یہ مہر و ماہ بہت

جنون عشق نے منزل کو جا لیا ورنہ

قدم قدم پہ ہوئی عقل سد راہ بہت

زمانہ اب بھی ہے فرہاد و قیس پہ ناقد

محبتوں کے خطا وار کم گواہ بہت

یہ جبر و قدر ہیں کیا خیر و شر ہیں کیا لیکن

گئے گناہ بہت کم ہوئے گناہ بہت

کچھ اور فکر سخن کا صلہ ہو کیا تاباںؔ

تمہاری آہ کو ملتی ہے واہ واہ بہت