baDhaiye na zamane se rasm-o-rah bahut

baḌhā.iye na zamāne se rasm-o-rāh bahut

parī-jamāloñ ke hote haiñ ḳhair-ḳhvāh bahut

satā.ish-e-lab-o-ruḳhsār kuchh ḳhatā to na thī

zarā sī baat pe bigḌe vo ḳhvāh-maḳhvāh bahut

ruḳh-o-jabīñ pe jo un ke kabhī nazar karte

na āb-o-tāb dikhāte ye mehr-o-māh bahut

junūn-e-'ishq ne manzil ko jā liyā varna

qadam qadam pe huī 'aql sadd-e-rāh bahut

zamāna ab bhī hai farhād-o-qais pe nāqid

mohabbatoñ ke ḳhatā-vār kam gavāh bahut

ye jabr-o-qadr haiñ kyā ḳhair-o-shar haiñ kyā lekin

ga.e gunāh bahut kam hue gunāh bahut

kuchh aur fikr-e-suḳhan kā sila ho kyā 'tābāñ'

tumhārī aah ko miltī hai vaah vaah bahut

baDhaiye na zamane se rasm-o-rah bahut

pari-jamalon ke hote hain KHair-KHwah bahut

sataish-e-lab-o-ruKHsar kuchh KHata to na thi

zara si baat pe bigDe wo KHwah-maKHwah bahut

ruKH-o-jabin pe jo un ke kabhi nazar karte

na aab-o-tab dikhate ye mehr-o-mah bahut

junun-e-'ishq ne manzil ko ja liya warna

qadam qadam pe hui 'aql sadd-e-rah bahut

zamana ab bhi hai farhad-o-qais pe naqid

mohabbaton ke KHata-war kam gawah bahut

ye jabr-o-qadr hain kya KHair-o-shar hain kya lekin

gae gunah bahut kam hue gunah bahut

kuchh aur fikr-e-suKHan ka sila ho kya 'taban'

tumhaari aah ko milti hai wah wah bahut