ستم دیدہ ہوں چرخ نیلگوں کا

ستم دیدہ ہوں چرخ نیلگوں کا

بغل میں دل نہیں ساغر ہے خوں کا

جلا کر ہڈیاں تک خاک کر دیں

برا ہو شعلۂ سوز دروں کا

بھرے گا کیا فلک کشکول سائل

مشابہ خود ہے چشم واژگوں کا

قلم نے شان قدرت کی دکھائی

جریدہ لکھ کے حرف کاف و نوں کا

بہار باغ کا موسم ہے ساقی

پلا ساغر شراب لالہ گوں کا

نہ رو اے طفل ہنگام ولادت

مآل اچھا نہیں ہے اس شگوں کا

پھنسا لیتے ہیں دل آنکھوں سے معشوق

نگاہیں کام کرتی ہیں فسوں کا

بہار عمر اب آخر ہے کاملؔ

اتارو جسم سے جامہ جنوں کا