sitam-dida hun charKH-e-nilgun ka

sitam-dīda huuñ charḳh-e-nīlgūñ kā

baġhal meñ dil nahīñ sāġhar hai ḳhuuñ kā

jalā kar haDDiyāñ tak ḳhaak kar diiñ

burā ho sho’la-e-soz-e-darūñ kā

bharegā kyā falak kashkol saa.il

mushābah ḳhud hai chashm-e-vāzhgūñ kā

qalam ne shaan qudrat kī dikhā.ī

jarīda likh ke harf-e-kāf-o-nūñ kā

bahār-e-bāġh kā mausam hai saaqī

pilā sāġhar sharāb-e-lāla-gūñ kā

na ro ai tifl hangām-e-vilādat

ma.aal achchhā nahīñ hai is shugūñ kā

phañsā lete haiñ dil āñkhoñ se mā'shūq

nigāheñ kaam kartī haiñ fusūñ kā

bahār-e-‘umr ab āḳhir hai 'kāmil'

utāro jism se jaama junūñ kā

sitam-dida hun charKH-e-nilgun ka

baghal mein dil nahin saghar hai KHun ka

jala kar haDDiyan tak KHak kar din

bura ho sho’la-e-soz-e-darun ka

bharega kya falak kashkol sail

mushabah KHud hai chashm-e-wazhgun ka

qalam ne shan qudrat ki dikhai

jarida likh ke harf-e-kaf-o-nun ka

bahaar-e-bagh ka mausam hai saqi

pila saghar sharab-e-lala-gun ka

na ro ai tifl hangam-e-wiladat

maal achchha nahin hai is shugun ka

phansa lete hain dil aankhon se ma'shuq

nigahen kaam karti hain fusun ka

bahaar-e-‘umr ab aaKHir hai 'kaamil'

utaro jism se jama junun ka