چارہ گری محال تری جستجو میں ہے

چارہ گری محال تری جستجو میں ہے

سو خوف اندمال تری جستجو میں ہے

کل کی کسے خبر کہ کرے کون جستجو

اس دم خراب حال تری جستجو میں ہے

زندہ ہے تیری یاد کو یکجا کئے ہوئے

وہ صاحب کمال تری جستجو میں ہے

مخمور کر رہی ہے نگاہوں کی آرزو

فرقت میں بھی وصال تری جستجو میں ہے

اک بار دیکھ آ کے مری حالت تباہ

کس نہج پر خیال تری جستجو میں ہے

ہے تنگیٔ حیات بھی ہر لحظہ جستجو

جینا مگر محال تری جستجو میں ہے

لیتی ہے انتقام ترے بن فنائے زیست

یہ سانس بھی بحال تری جستجو میں ہے

بیتابیوں کو بعد ترے کون دے جواب

میرا تو ہر سوال تری جستجو میں ہے

کر دے جو آشنا مجھے عہد عروج سے

وہ حسرت زوال تری جستجو میں ہے

رقص بہار ہو کہ ہو باد خزاں کا شور

ایک ایک ماہ و سال تری جستجو میں ہے

تو دختر نسیم سحر ہے تو روشنی

اک آئنہ مثال تری جستجو میں ہے