دیکھی ہے جس بھی شخص نے تیری نظر کی دھوپ
دیکھی ہے جس بھی شخص نے تیری نظر کی دھوپ
کیا اس کو پھر جلائے گی یہ دوپہر کی دھوپ
دشواریوں کے بعد ہیں آسانیاں یہاں
ہوگی شجر کی چھاؤں سے پہلے سفر کی دھوپ
مانند سائبان تھا میں اس کے واسطے
بدلے میں اس سے مجھ کو ملی عمر بھر کی دھوپ
آسائشوں میں بیٹھ کے روشن نہیں ہوئے
جھیلی ہے خوب ہم نے میاں رہ گزر کی دھوپ
اس خیر و شر کی راہ میں ہر ایک گام پر
ہر سائبان خیر کے اوپر ہے شر کی دھوپ
شاخوں سے آتی کرنوں کے مانند لگتی ہے
چھاؤں میں تیری زلف کی تیری نظر کی دھوپ
ایسی سکون بخش ہے صفدرؔ تری نگاہ
جیسے سویرے ٹھنڈ میں پہلے پہر کی دھوپ
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.