غم کی تصویر بہت دیر سے دھندلائی ہے

غم کی تصویر بہت دیر سے دھندلائی ہے

لے کے خوشیوں کی خبر باد صبا آئی ہے

کر کے رسوا مجھے مسند پہ بٹھانے والو

یہ پذیرائی بھی کیا خاک پذیرائی ہے

دل خستہ تری قربت کا طلبگار نہیں

دل خستہ تری چاہت کا تمنائی ہے

معذرت ہم سے سیاست تو نہیں ہو سکتی

ہم نے سچ بولتے رہنے کی قسم کھائی ہے

مجھ کو روتے ہوئے دیکھا تو ہنسی چھوٹ گئی

تو بھی دنیا کی طرح میرا تماشائی ہے

اب نہ وحشت میں کہیں پھوڑ لوں آنکھیں اپنی

خواب دیکھا ہے جو آنکھوں نے وہ صحرائی ہے

جانے اب کس کی نظر کا یہ اثر ہے اظہرؔ

نہ تو خوشبو ہے چمن میں نہ ہی رعنائی ہے