gham ki taswir bahut der se dhundlai hai

ġham kī tasvīr bahut der se dhuñdlā.ī hai

le ke ḳhushiyoñ kī ḳhabar bād-e-sabā aa.ī hai

kar ke rusvā mujhe masnad pe biThāne vaalo

ye pazīrā.ī bhī kyā ḳhaak pazīrā.ī hai

dil-e-ḳhasta tirī qurbat kā talab-gār nahīñ

dil-e-ḳhasta tirī chāhat kā tamannā.ī hai

mā'zarat ham se siyāsat to nahīñ ho saktī

ham ne sach bolte rahne kī qasam khaa.ī hai

mujh ko rote hue dekhā to hañsī chhūT ga.ī

tū bhī duniyā kī tarah merā tamāshā.ī hai

ab na vahshat meñ kahīñ phoḌ luuñ āñkheñ apnī

ḳhvāb dekhā hai jo āñkhoñ ne vo sahrā.ī hai

jaane ab kis kī nazar kā ye asar hai 'az.har'

na to ḳhushbū hai chaman meñ na hī rā'nā.ī hai

gham ki taswir bahut der se dhundlai hai

le ke KHushiyon ki KHabar baad-e-saba aai hai

kar ke ruswa mujhe masnad pe biThane walo

ye pazirai bhi kya KHak pazirai hai

dil-e-KHasta teri qurbat ka talab-gar nahin

dil-e-KHasta teri chahat ka tamannai hai

ma'zarat hum se siyasat to nahin ho sakti

hum ne sach bolte rahne ki qasam khai hai

mujh ko rote hue dekha to hansi chhuT gai

tu bhi duniya ki tarah mera tamashai hai

ab na wahshat mein kahin phoD lun aankhen apni

KHwab dekha hai jo aankhon ne wo sahrai hai

jaane ab kis ki nazar ka ye asar hai 'azhar'

na to KHushbu hai chaman mein na hi ra'nai hai