تیرے بغیر لگتا ہے گویا یہ زندگی

تنقید کر رہی ہے مری خواہشات پر

کیا زمانہ تھا کہ ہم خوب جچا کرتے تھے

اب تو مانگے کی سی لگتی ہیں قبائیں اپنی

وہ مجبوری موت ہے جس میں کاسے کو بنیاد ملے

پیاس کی شدت جب بڑھتی ہے ڈر لگتا ہے پانی سے

میں بیٹھ گیا خاک پہ تصویر بنانے

جو کبر تھے مجھ میں وہ تری یاد سے نکلے

گھر میں رہنا مرا گویا اسے منظور نہیں

جب بھی آتا ہے نیا کام بتا جاتا ہے

گزر چکا ہے زمانہ وصال کرنے کا

یہ کوئی وقت ہے تیرے کمال کرنے کا

ڈر ہے کہیں میں دشت کی جانب نکل نہ جاؤں

بیٹھا ہوں اپنے پاؤں میں زنجیر ڈال کر

ہم اپنے ظاہر و باطن کا اندازہ لگا لیں

پھر اس کے سامنے جانے کی تیاری کریں گے

تیری ہی طرح آتا ہے آنکھوں میں ترا خواب

سچا نہیں ہوتا کبھی جھوٹا نہیں ہوتا

ہوا چراغ بجھانے لگی تو ہم نے بھی

دیے کی لو کی جگہ تیرا انتظار رکھا

تو خود بھی جاگتا رہ اور مجھ کو بھی جگاتا رہ

نہیں تو زندگی کو دوسرا قصہ پکڑ لے گا

جگہ بدلنے سے ہیئت کہاں بدلتی ہے

جو آئنہ ہے سدا آئنہ رہے گا وہ

جس دن کے گزرتے ہی یہاں رات ہوئی ہے

اے کاش وہ دن میں نے گزارا نہیں ہوتا

بہت کچھ تم سے کہنا تھا مگر میں کہہ نہ پایا

لو میری ڈائری رکھ لو مجھے نیند آ رہی ہے

جس لفظ کو میں توڑ کے خود ٹوٹ گیا ہوں

کہتا بھی تو وہ اس کو گوارا نہیں ہوتا

ہمسائے کا سکھ تو اس کے خواب کا پورا ہونا ہے

تم پر رقت طاری ہو تو رو لو لیکن شور نہ ہو

آنکھ سے آنکھ ملانا تو سخن مت کرنا

ٹوک دینے سے کہانی کا مزا جاتا ہے

خود کو میں بھلا زیر زمیں کیسے دباتا

جتنے بھی کھنڈر نکلے وہ آباد سے نکلے

جیسے سجدے میں قتل ہو کوئی

ایسا ہوتا ہے چاہتوں کا مزا

جواب دیتا ہے میرے ہر اک سوال کا وہ

مگر سوال بھی اس کی طرف سے ہوتا ہے

محسنؔ برے دنوں میں نیا دوست کون ہو

ہے جس کا پہلا قرض اسی سے سوال کر

عجیب شخص تھا لوٹا گیا مرا سب کچھ

معاوضہ نہ لیا دیکھ بھال کرنے کا

بہت اچھا تری قربت میں گزرا آج کا دن

بس اب گھر جائیں گے اور کل کی تیاری کریں گے