khīñch laa.ī hai mohabbat tire dar par mujh ko

itnī āsānī se varna kise hāsil huā maiñ

khinch lai hai mohabbat tere dar par mujh ko

itni aasani se warna kise hasil hua main

būḌhī maañ kā shāyad lauT aayā bachpan

guḌiyoñ kā ambār lagā kar baiTh ga.ī

buDhi man ka shayad lauT aaya bachpan

guDiyon ka ambar laga kar baiTh gai

mire ḳhilāf sabhī sāzisheñ rachīñ jis ne

vo ro rahā hai mirī dāstāñ sunātā huā

mere KHilaf sabhi sazishen rachin jis ne

wo ro raha hai meri dastan sunata hua

kal terī tasvīr mukammal kī maiñ ne

fauran us par titlī aa kar baiTh ga.ī

kal teri taswir mukammal ki main ne

fauran us par titli aa kar baiTh gai

rishta bahāl kaash phir us kī galī se ho

jī chāhtā hai ishq dobāra usī se ho

rishta bahaal kash phir us ki gali se ho

ji chahta hai ishq dobara usi se ho